Klima- og miljøminister Andreas Bjelland Eriksen deltek på eit ministermøte for klimaet i København. Der har han presentert Noregs nye klimamål. Under møtet vil Noreg òg leie diskusjonar om rettferdig omstilling i klimapolitikken.
– Fram mot klimatoppmøtet i Brasil treng vi å sjå sterke signal om nye klimamål som anerkjenner innsatsen til partane og stadfestar forpliktinga vår til å halde 1,5-gradersmålet innan rekkevidde. Vi må òg anerkjenne at vi må gjere meir og gjere det raskare om vi skal komme i mål. For meg er det viktig å vise verda at Noreg kjem til å levere eit ambisiøst klimamål for 2035. Skal vi sikre folk ei trygg framtid, må klimapolitikken også prioriterast i utrygge tider. Klimatoppmøtet i Belém må sende sterke politiske signal og levere praktiske resultat i alle forhandlingsspor slik at internasjonalt samarbeid støttar opp om høge ambisjonar og handling frå alle land, seier klima- og miljøminister Andreas Bjelland Eriksen.